唔舒服, 作反了~

朗朗上個weekend唔舒服, 燒左2日, 之後就開始咳, 食左藥會眼訓。   好喇,  呢位小朋友開始少少事就扭計,  (我一向都唔主張打同大聲鬧 )   問佢咩事, 佢只係喊同要人抱, 直到扭到累, 就暗左佢訓,  以我解讀佢呢個行為係因為食左藥唔舒服wingwing下, 但又唔知點表達, ok~ 同婆婆傾完大家都覺得唔好責怪佢。

點知呢位小朋友食過返尋味, 呢幾日出現多左唔合理既扭計同攪事既行為, 我就諗, 唔舒服都唔可以咩都就晒佢架喎,  要做返d野先得~~

好喇, 尋晚收工返到去, 衰仔唔叫我掛住玩, 之後我攬佢同佢say hello, 再問佢同我hello未, 佢推開我. 話"我唔得閒, 玩緊呀"    一,一.....      我stop唔比佢玩,  解釋佢知要點做, 打招呼係禮貌行為, 唔得閒都要有禮貌, 可以say hello之後再玩, 佢話"知道!"

跟住成晚就好似借左龍耳陳咁, 叫佢做咩都唔聽.。  晚飯時間, 食飯又係唔乖, 又要lee樣又要個樣.  比杯水佢飲.. 又專登倒係台面, 平時間唔中都有咁,我就會warn佢, 話再係咁.我罰.

哼. 尋晚見佢表現not gd..   呢次唔warn喇.  一黎就罰佢.

條友即刻喊到咩咁, 又搵婆婆又..望公公想有人救佢!  我好安慰既係. 公公婆婆,,一粒聲都冇出過..  各自做自己野, 最後佢冇再喊, 我就講返佢點解比我罰..  等等..      

哼.. 之後成晚都好乖..       冇再扭過計!     

呢一次我發現一樣野,  小朋友講道理係好, 但如果太多, 就變成"哦"  呀媽就變左陳記燒鵝,  點都要take action, 因為佢未試過錯左之後被罰既結果係點, 就不斷試你底線!  

心情即刻舒暢晒~~~

美滿假期

連放三日假，大晴天，很美滿!

假期第一天，爸爸提議帶朗哥去游水，哈! 大個仔喜歡自己做選擇，爸爸想佢去深水一點既池，但朗哥堅持唔去，要留係朗朗池到玩 (將bb池自己改名)  而我就陪妹妹坐係旁邊， 雖然冇落水， 睇住哥哥玩水都係一件樂事。

假期第二天，一家大細都去左掃墓 (好環保的, 只有鮮花水果清香)，朗朗第２次同我地一齊去，上一次係歲半前，佢咩都唔知道，只係知道有野食 XD ,  呢次已經27個月大....好大既分別!

"咩黎架?"
"去邊到架?"
"邊個黎架?"     　

作為MAMI，要用最簡單既說話去解答問題，唔知朗朗明唔明我講咩既呢？　　

見到婆婆點完香，好奇既朗伸手去摸，叫都叫唔住，不過事後佢知道會痛會灼到手，就冇再去掂，仲識同我地講　"唔好掂既, 好熱熱既"

我仲累過佢，返到去想小休，點知呢位小朋友仲可以同LULU去散步，太強了吧 (暈~)

假期第三天，每朝訓醒，都會有哥哥妹妹親親時間。　朗哥趁住呢個時間就會整蠱妹妹，但我睇得出佢係好鍚好喜愛晴晴 ^_^

午飯過後，齊齊出發去玩水喇～～～～～～ＹＥＡＨ！！！！

超熱超曬，都係個句，見到朗哥玩得好開心我就開心，出左幾多粒雀斑都唔理了。

相約２位小妹妹一齊享受玩沙樂趣，見到３個小朋友坐埋一齊，好可愛呀！晴晴大個就可以加入，到時再熱鬧一點。　　

呢個假期係咪好美滿呢～～

後記：我同爸爸累到甩轆